الى الجنة يا مايكل جاكسون
مرسل: الأحد يونيو 28, 2009 11:21
كان لموت المغني الشهير مايكل ردود فعل عالميا وفي كثير من الأوساط الفنية والشعبية والدينية وأثار جدلا واسعا فبعضهم يقول انه اسلم وكانت الأوساط العربية والإسلامية قد تداولت خبرا عن إسلامه لدى وصوله إلى العاصمة البحرينية المنامة عام 2005، حيث كان شقيقه جيرمين المسلم يقيم فيها.وقد تردد أن جاكسون اعتنق الإسلام رسميا، فذكرت صحيفة "صن" أنه تحول سرا إلى الإسلام وأقسم الولاء للقرآن بحضور شيخ في منزله بلوس أنجليس.
اسلم أو لم يسلم ليس هذا هو هدفي من هذه المقالة بل أن هدفي هو هؤلاء العرب الذين تفرغوا لاصدار الأحكام على الأشخاص والهيئات والمؤسسات ويحقدون حتى على أنفسهم وأمهاتهم وإخوانهم وكأن هؤلاء المتخصصين في الحقد لا (شغل لهم ولا مشغلة) الا النمّ والنميمة و بدهم (عرس يلطموا فيه) وصاروا يصدروا أحكام ويطلقوا عبارات وفتاوى ونصبوا أنفسهم آلهة لإدخال الناس الجنة او النار (الى جهنم يا مايكل وبئس المصير)و(ما بشرفنا تكون مسلم)
أول شي ما في حدا اله الحق يعطي صكوك هذا للجنة وهذا للنار هذا كافر وهذا مسلم هذا ابن حلال وهذا ابن حرام الله وحده هو صاحب هذا الحق
ما بدنا مايكل في الإسلام وما بشرفنا انه يكون مايكل مسلم طيب لماذا ياهؤلاء؟ ليش بجوز لأنه الإسلام شركة خاصة للي خلّفهم!! يا عمي هذا الإسلام مش لحدا ولا هو ملك أشخاص عشان تتشرف او ما تتشرف! الإسلام لله والله وحده مالك هذا الحق وما في أوصياء على الدين لا أشخاص ولا جماعات ولا أحزاب الدين لله والبشر عباد الله والله هو الذي يحكم لنا وعلينا
طيب مايكل اسلم ولا ما اسلم انتم الأوصياء او نحن عامة الناس شو بنخسر او بنكسب على العكس بنكسب انه مايكل أخيرا اقتنع بالإسلام وانه الإسلام دين عظيم ودين تسامح
طيب هذول اللي بيحكوا الى جهنم يا مايكل وبئس المصير حدا يفهمني شو اجاه!!؟ شو اللي بدهم يستفيدوا من دخول مايكل جهنم!! يعني بكونوا مبسوطيين وبيتلذذوا بتعذيب البشر!!
بدي حدا يفهمني للجنة ولا للنار شو اجاك انت ؟ شو الفائدة اللي حققتها انت !!!وماذا جنيت من دخول مايكل النار او غير مايكل هذول جاهزين لكل عرس يلطموا لما ماتت عندنا الرقاصة المغربية او قالوا انتحرت كانو جاهزين قالوا على النار ولما انتحرت الخادمة قالوا للجنة والله يرحمها ولما بحاول واحد الانتحار بيحكوا ليش ما تركتوه ينتحر للجهنم وكأنه يا اخي ما بدهم إلا انهم يتلذذوا بعذاب الناس! ؟
طيب يا جماعة مايكل راح وقابل ربه بدل ما ننشغل بجلده وإصدار أحكام احنا مش معنيين بإصدارها نتحسس روسنا يمكن احنا بخطر ويمكن لو نفكر بحالنا وننشغل بأنفسنا بكون أحسن